مشکوۃ شریف

لوگوں میں تغیر وتبدل کا بیان

آخرت کے خوف نے آپ صلی اللہ علیہ وآلہ وسلم کو جلد بوڑھا کر دیا تھا

وعن أبي جحيفة قال قالوا يا رسول الله قد شبت . قال شيبتني سورة هود وأخواتها . رواه الترمذي .-

حضرت ابوجحیفہ رضی اللہ عنہ کہتے ہیں کہ جب صحابہ نے یہ عرض کیا کہ یا رسول اللہ صلی اللہ علیہ وآلہ وسلم ! آپ تو بوڑھے ہو گئے یعنی بڑی عمر کو پہنچنے سے پہلے ہی آپ پر بڑھاپے کے اثرات ظاہر ہو گئے ہیں؟ تو آپ صلی اللہ علیہ وآلہ وسلم نے فرمایا۔ سورت ہود اور اس جیسی سورتوں نے مجھ کو بوڑھا کر دیا ہے۔ (ترمذی) تشریح یعنی سورت ہود اور ان جیسی سورتوں میں قیامت اور آخرت کے عذاب کا بہت زیادہ ذکر ہے۔ ان کے مضمون دیکھ دیکھ کر اپنی امت کی طرف سے یہ غم مجھے کھائے جا رہا ہے کہ نہ معلوم میری امت کے لوگوں کا کیا حشر ہوگا ، یہی غم کھاتے کھاتے میرا یہ حال ہو گیا ہے۔

-

وعن ابن عباس قال قال أبو بكر يا رسول الله قد شبت . قال شيبتني ( هود ) و( المرسلات ) و( عم يتساءلون ) و( إذا الشمس كورت ) . رواه الترمذي . وذكر حديث أبي هريرة لا يلج النار في كتاب الجهاد .-

حضرت ابن عباس رضی اللہ عنہ کہتے ہیں کہ ایک دن حضرت ابوبکر رضی اللہ عنہ کہنے لگے یا رسول اللہ! ( صلی اللہ علیہ وآلہ وسلم ) تو بہت جلد بوڑھے ہو گئے ؟ حضور صلی اللہ علیہ وآلہ وسلم نے فرمایا۔ ہاں سورت ہود، سورت واقعہ، سورت مرسلات ، عم یتساء لون اور اذالشمس کورت اور ان جیسی دوسری سورتوں نے (کہ جن میں قیامت اور اس کے احوال کا ذکر ہے) مجھ کو بڑی عمر تک پہنچنے سے پہلے ہی بوڑھا کر دیا ہے۔ (ترمذی) اور حضرت ابوہریرہ رضی اللہ عنہ کی روایت لایلج النار الخ کتاب الجہاد میں نقل کی جا چکی ہے

-